Anachak Angkor

និស្សិតខ្មែរសិក្សានៅអាមេរិក ប្រាប់ពីល្បិចសុំអាហារូបករណ៍បរទេស

មិនងាយមាននិស្សិតខ្មែរណាអាចទទួលបានអាហារូបករណ៍ទៅសិក្សានៅបរទេសពីរដងផ្ទួនគ្នាទេ ប៉ុន្តែ មាស ថុង គឺជាម្នាក់ក្នុងចំណោមនិស្សិតដ៏កម្រទាំងនោះ។ នៅឆ្នាំ២០០៨កន្លងទៅ អតីតនិស្សិតសាកលវិទ្យាល័យភូមិន្ទកសិកម្មរូបនេះ ទទួលបានអាហារូបករណ៍ទៅសិក្សាបញ្ចប់ថ្នាក់បរិញ្ញាប័ត្ររយៈពេលមួយឆ្នាំនៅប្រទេសអូស្រ្តាលី។

បច្ចុប្បន្ន យុវជនដែលមានស្រុកកំណើតនៅខេត្តសៀមរាបរូបនេះ កំពុងសិក្សាថ្នាក់អនុបណ្ឌិតរយៈពេលពីរឆ្នាំ ឯសាកលវិទ្យាល័យ University of Kentucky សហរដ្ឋអាមេរិក។ ថ្លៃជួលផ្ទះ ថ្លៃសាលា ថ្លៃម្ហូបអាហារ ថ្លៃប្រដាប់ប្រដារៀនសូត្រ ថ្លៃសំបុត្រយន្តហោះទៅមក និងថ្លៃចាយវាយផ្សេងទៀត គឺអាហារូបករណ៍នោះរ៉ាបរងទាំងអស់។

ចង់ដឹងថា និស្សិតខ្មែររូបនេះមានបច្ចេកទេសស្វះស្វែងរកអាហារូបករណ៍យ៉ាងណា ថ្ងៃនេះ Sabay បានធ្វើបទសម្ភាសន៍ជាមួយរូបលោកដូចតទៅ៖

មាស ថុង

Sabay៖ លោក មាស ថុង តើអាហារូបករណ៍ដែលលោកកំពុងសិក្សានេះ មានឈ្មោះអ្វីដែរ ហើយលោកដឹងព័ត៌មានអំពីវាដោយរបៀបណា?
មាស ថុង៖ អាហារូបករណ៍ដែលខ្ញុំទទួលបាននេះមានឈ្មោះថា Cambodia HARVEST Scholarship Program, ជាកម្មវិធីដែលរៀបចំដោយ កម្មវិធីអភិវឌ្ឍន៍កសិកម្មមួយនៅប្រទេសកម្ពុជាយើងឈ្មោះថា Cambodia HARVEST Program ក្រោមជំនួយរបស់ទីភ្នាក់ងារអភិវឌ្ឍន៍អន្តរជាតិ នៃសហរដ្ឋអាមេរិក(USAID)។

ក្រៅពីកម្មវិធីបែបនេះ ក៏មានកម្មវិធីដ៏ទៃទៀតដែលឧបត្ថម្ភនិស្សិតមកសិក្សានៅសហរដ្ឋអាមេរិក ដូចជាកម្មវិធី Fulbright ជាដើម ដែលជាអាហារូករណ៍ដ៏ល្បីមួយរបស់អាមេរិក។ ព័ត៌មានទាក់ទងនឹងអាហារូបករណ៍ Fulbright នេះ យើងអាច ស្វែងរកបានតាមរយៈវិបសាយរបស់ស្ថានទូតអាមេរិកប្រចាំរាជធានីភ្នំពេញ និងគេហទំព័របរទេសផ្សេងទៀត។ មិនមានអ្វីជាលាក់កំបាំងទេ ពេលណារដូវបើកប្រកាសប្រគល់អាហារូបករណ៍មកដល់ ស្ថានទូតអាមេរិកនឹងជូនដំណឹងដល់និស្សិតខ្មែរ ទាំងនៅភ្នំពេញ និងតាមបណ្ដាខេត្តបានដឹងមិនខានឡើយ។

តាមពិតទៅ ខ្ញុំក៏ធ្លាប់ប៉ងអាហារូបករណ៍ Fulbright នេះដែរ ហើយខ្ញុំក៏ធ្លាប់បានដាក់ពាក្យសុំអាហារូបករណ៍កម្មវិធីផ្សេងទៀតជាច្រើនដែរកន្លងមក តែខ្ញុំបែរជាមានសំណាងមកជាប់អាហារូបករណ៍ទៅសិក្សានៅសហរដ្ឋអាមេរិក តាមរយៈកម្មវិធី USAID Cambodia HARVEST Program ទៅវិញ កាលពីឆ្នាំទៅមិញ។ កម្មវិធីនេះ ក៏មានលក្ខណៈស្រដៀងនឹងកម្មវិធី Fulbright ដែរ។ ចំណែកឯដំណឹងទាក់ទងនឹងកម្មវិធីនេះ ខ្ញុំទទួលបានតាមរយៈសារ email ការផ្សាយតាមទំព័រកាសែត និងការធ្វើបទបង្ហាញដោយអ្នករៀបចំកម្មវិធីផងដែរ។

Sabay៖ អាចប្រាប់ព័ត៌មានជុំវិញអាហារូបករណ៍របស់អ្នកបន្តិចបានទេ?
មាស ថុង៖ កម្មវិធីអាហារូបករណ៍ដែលខ្ញុំកំពុងតែរៀននេះ គឺផ្ដល់សម្រាប់និស្សិតខ្មែរ ដែលចង់ស្វែងរកការសិក្សាថ្នាក់អនុបណ្ដិតនៅសហរដ្ឋអាមេរិក ផ្នែកជំនាញដែលពាក់ព័ន្ធនឹងកសិកម្ម។ ហើយឥឡូវ ខ្ញុំកំពុងសិក្សាយកអនុបណ្ឌិត ផ្នែកសេដ្ឋកិច្ចកសិកម្ម រយៈពេលពីរឆ្នាំនៅសាកលវិទ្យាល័យ University of Kentucky ឯសហរដ្ឋអាមេរិក។

Sabay៖ តើធ្វើម៉េចដើម្បីទទួលបានអាហារូបករណ៍នេះ?
មាស ថុង៖ រឿងសុំអាហារូបករណ៍ គឺត្រូវឆ្លងកាត់ការប្រកួតប្រជែងខ្លាំងណាស់ និងតម្រូវឲ្យសរសេរពាក្យស្នើសុំ និងលក្ខខណ្ឌមួយចំនួន ដូចជាឲ្យមានបទពិសោធន៍បម្រើការងារមួយចំនួនទៀតផង។ តម្រូវការទីមួយក្នុងការទៅសិក្សានៅសហរដ្ឋអាមេរិក គឺកម្រិតភាសាអង់គ្លេង។ ដើម្បីឲ្យពាក្យសុំអាហារូបករណ៍របស់យើងត្រូវបានគណៈមេប្រយោគពិចារណា អ្នកត្រូវតែមានពិន្ទុ TOEFL iBT ៨០ ឬ IELTS ៦.៥ តែបើបាន TOEFL iBT ៨៨ ឬ IELTS ៧.០ គឺកាន់តែប្រសើរ ជាពិសេសសម្រាប់អាហារូបករណ៍ Fulbright។ ដូច្នេះបើសិនអ្នកមានបំណងចង់សុំអាហារូបករណ៍ ពិន្ទុភាសាអង់គ្លេសខ្ពស់នឹងជួយឲ្យពាក្យស្នើសុំរបស់អ្នកកាន់តែមានអាទិភាពខ្ពស់។

ប៉ុន្តែទន្ទឹមនឹងនោះដែរ សម្រាប់និស្សិតដែលប្រាថ្នាចង់ទៅសិក្សានៅសហរដ្ឋអាមេរិក គួរតែត្រៀមសម្រាប់ការធ្វើតេស្តកំរិតអន្តរជាតិផ្សងទៀត ដូចជា GRE និងGMAT ឲ្យហើយទៅ។

លើសពីនេះ អាហារូបករណ៍ទូទៅ នឹងទាមទា កម្រិតពិន្ទុមធ្យម ឬហៅកាត់ថា GPA ខ្ពស់, មានបទពិសោធន៍ការងារ និងធ្លាប់បម្រើការងារក្នុងវិស័យណាមួយកន្លងមក។ កម្រិតGPAទាបបំផុតក៏ ៣.០ដែរ។ សម្រាប់បទពិសោធន៍ការងារវិញ កម្មវិធីអាហារូបករណ៍ខ្លះនឹងកំណត់ថា បេក្ខជនត្រូវធ្លាប់ធ្វើការរយៈពេលណាមួយ ហើយការងារនោះទាក់ទងនឹងអាហារូបករណ៍ដែលកំពុងស្នើសុំ។

Sabay៖ ជាធម្មតា ក្នុងពាក្យសុំអាហារូបករណ៍ គេនឹងតម្រូវឲ្យសរសេរអត្ថបទមួយ (Essay)។ តើក្នុងអត្ថបទនោះគួរសរសេរបែបណា?
មាស ថុង៖ ដើម្បីអាចសរសេរEssayបានល្អ គឺអ្នកត្រូវតែបង្ហាញថា អ្នកពិតជាបេក្ខជនដ៏ស័ក្តសមបំផុតសម្រាប់អាហារូបករណ៍នេះ។ សម្រាប់ Development Scholarship នៅក្នុងពាក្យស្នើសុំ ត្រូវតែពិពណ៌នាអំពីគុណសម្បត្តិផ្ទាល់ខ្លួនរបស់អ្នក, ការរួមចំណែករបស់អ្នកជួយសង្គមនាពេលកន្លងមក, ការប្តេជ្ញាចិត្តរបស់អ្នកដើម្បីជួយអភិវឌ្ឍសង្គម, តើអ្នកនឹងធ្វើឲ្យគម្រោងរបស់អ្នកចេញជាផ្លែផ្កាដោយរបៀបណា, ហើយអ្វីដែលសំខាន់បំផុតនោះ តើអាហារូបករណ៍នេះនឹងជួយឲ្យអ្នកសម្រេចបំណងប្រាថ្នារបស់ខ្លួនបានដោយរបៀបណា។ ទាំងនេះ គឺជាអ្វីដែលខ្ញុំបានសរសេរចូលក្នុងពាក្យសុំអាហារូបករណ៍របស់ខ្ញុំ ហើយវាពិតជាមានប្រសិទ្ធិភាពមែន។

Sabay៖ តើការសុំអាហារូបករណ៍មួយ តម្រូវឲ្យមានការត្រៀមខ្លួនអ្វីខ្លះ?
មាស ថុង៖ ការត្រៀមខ្លួនសម្រាប់សុំអាហារូបករណ៍គឺសាមញ្ញទេ។ ដំបូង ខ្ញុំគ្រាន់តែដុះខាត់ភាសាអង់គ្លេសរបស់ខ្ញុំឲ្យកាន់តែប្រសើរឡើង។ ភាសាអង់គ្លេសមិនមែនត្រឹមតែសម្រាប់ប្រជែងយកអាហារូបករណ៍ប៉ុណ្ណោះទេ ប៉ុន្តែជំនាញនេះសំខាន់ណាស់សម្រាប់ពេលបានអាហារូបករណ៍ហើយ ចូលទៅសិក្សានៅប្រទេសគេ និងសំខាន់សម្រាប់ការងារនាថ្ងៃអនាគតរបស់យើងដែរ។

ទន្ទឹមគ្នានោះដែរ ខ្ញុំតែងតែស្រាវជ្រាវដំណឹងផ្សេងៗទាក់ទងនឹងអាហារូបករណ៍ដែលធ្លាប់ផ្ដល់ឲ្យនិស្សិតខ្មែរនាពេលកន្លងមក និងកាលបរិច្ឆេទបិទការស្នើសុំអាហារូបករណ៍នោះ។ នៅពេលអាហារូបករណ៍ណាមួយធ្លាក់មកដល់ ខ្ញុំគ្រាន់តែដាក់ពាក្យសុំបន្តការសិក្សាតែជំនាញណាដែលទាក់ទងនឹងការសិក្សាមុនៗ និងការងាររបស់ខ្ញុំតែប៉ុណ្ណោះ។

Sabay៖ ក្រោយពេលដាក់ពាក្យរួច អ្នកត្រូវបានគេទូរសព្ទហៅឲ្យមកសម្ភាសន៍ តើត្រូវត្រៀមខ្លួនយ៉ាងណាដែរ?
មាស ថុង៖ ប្រសិនបើអ្នកត្រូវបានគេណាត់ឲ្យមកសម្ភាសន៍ នេះមានន័យថា អ្នកត្រូវតាមអ្វីដែលអាហារូបករណ៍នោះចង់បាន។ ជាធម្មតា ការសម្ភាសគឺគ្រាន់តែជាការផ្ទៀងផ្ទាត់អ្នក ជាមួយនឹងពាក្យសុំអាហារូបករណ៍របស់អ្នកតែប៉ុណ្ណោះ ប៉ុន្តែវានឹងផ្តល់ឱកាសមួយដល់អ្នកក្នុងការប្រាប់ដល់គណៈមេប្រយោគ លម្អិតបន្ថែមទៀតអំពីខ្លួនអ្នក។

ក្នុងការត្រៀមខ្លួនសម្រាប់សម្ភាសន៍ ខ្ញុំត្រូវមើលពាក្យស្នើសុំរបស់ខ្ញុំឡើងវិញ ពិនិត្យមើលអ្វីដែលគួរតែប្រាប់ដល់គណៈមេប្រយោគបន្ថែមទៀត ដូច្នេះធ្វើឲ្យដំណើរការនៃការស្នើសុំអាហារូបករណ៍របស់ខ្ញុំកាន់តែមានទម្ងន់ ប៉ុន្តែទន្ទឹមនឹងនោះដែរ ខ្ញុំត្រូវព្យាយាមបញ្ចុះបញ្ចូលគណៈមេប្រយោគ ថាខ្ញុំមានទំនុកចិត្តពេញលេញលើខ្លួនឯង និងមានការត្រៀមខ្លួនជាស្រេចក្នុងការបំពេញការសិក្សាបន្តនេះ។

Sabay៖ តើអ្នកមានជាយោបល់អ្វីផ្ដល់ដល់និស្សិតខ្មែរ ដែលចង់សុំអាហារូបករណ៍ដូចអ្នកដែរ ឬទេ?
មាស ថុង៖ ខ្ញុំយល់ថា និស្សិតដែលចង់ដាក់ពាក្យសុំអាហារូបករណ៍ ដំបូងត្រូវត្រៀមភាសាអង់គ្លេស (ដើម្បីធ្វើតេស្ត TOEFL/IELTS), លួចសាកល្បងធ្វើតេស្តកំរិតអន្តរជាតិផ្សេងៗទៀតដូចជា GRE ឬ GMAT, គួរចូលបម្រើការងារនៅស្ថាបនណាមួយដើម្បីទទួលបានបទពិសោធន៍ខ្លះ, រៀនសរសេរពាក្យសុំអាហារូបករណ៍ រៀបរាប់អំពីបទពិសោធន៍ផ្ទាល់ខ្លួន និងគោលដៅនៅថ្ងៃអនាគត, ប៉ុន្តែក្នុងពាក្យសុំអាហារូបករណ៍អ្នកក៏ត្រូវបន្ថែមអំពីគម្រងនៃការសិក្សារបស់អ្នកផងដែរ៕

Source : sabay

សមត្ថភាព និងការជឿជាក់លើខ្លួនឯងនាំឲ្យខ្ញុំជាប់អាហារូបករណ៍សិក្សានៅជប៉ុន

ជាទូទៅអ្នកមានសមត្ថភាព និងការជឿជាក់លើខ្លួនឯងរមែងទទួលបានភាពជោគជ័យ។ជាក់ស្តែងយុវជន ខឹម បូរិន អាយុ ២៤ ឆ្នាំបាននិយាយថា សមត្ថភាព និងការជឿជាក់លើខ្លួនឯងពិតជាកត្តាចម្បងមួយនាំឲ្យលោកជាប់អាហារូបករណ៍ និងកំពុងសិក្សានៅប្រទេសជប៉ុន ថ្នាក់អនុបណ្ឌិត ជំនាញកសិកម្ម។

មានស្រុកកំណើតនៅឯភូមិពេជ្រចង្វា ឃុំបឹងត្រាញខាងជើង ស្រុកសំរោងខេត្តតាកែវ បូរិន គឺជាអតីតនិស្សិតថ្នាក់បរិញ្ញាបត្រនៅសកលវិទ្យាល័យភូមិន្ទកសិកម្មជំនាញវិទ្យាសាស្ត្រកសិកម្ម និងបានជាប់អាហារូបករណ៍ទៅសិក្សានៅប្រទេសជប៉ុន កាលពីដើមឆ្នាំ២០១៣ កន្លងមកនេះ។

ក្រោមកម្មវិធីអាហារូបករណ៍ផ្ដល់ដោយក្រសួងអប់រំប្រទេសជប៉ុនដែលមានឈ្មោះថា MONBUKAGAKUSHO ឬ MEXT Scholarship 2013 បូរិន បានរៀបរាប់ថា មានកត្តាពីរយ៉ាងដែលនាំឲ្យលោកទទួលបានអាហារូបករណ៍នៅប្រទេសជប៉ុនគឺកត្តា ក្នុងខ្លួន និងកត្តាក្រៅខ្លួន។កត្តាក្នុងខ្លួនគឺ សមត្ថភាព និងការជឿជាក់លើខ្លួនឯង រីឯកត្តាក្រៅខ្លួនវិញគឺការគាំទ្រពីក្រុមគ្រួសារ ពីមនុស្សជាទីស្រលាញ់ និងការផ្ដល់កម្លាំងចិត្តខ្លាំងពីមិត្តភ័ក្ដិ ព្រមទាំងទទួលបានការណែនាំ និងចែករំលែកបទពិសោធន៍ពីអតីតនិស្សិតជយលាភីជំនាន់មុន។

បូរិន បានចែករំលែកបទពិសោធន៍របស់ខ្លួនទៀតថា ដើម្បីទទួលបានអាហារូបករណ៍សិក្សានៅប្រទេស ជប៉ុន បេក្ខជនអាចទាក់ទងនៅការិយាល័យអាហារូបករណ៍នៃក្រសួងអប់រំយុវជន និងកីឡា និងស្ថានទូតជប៉ុនប្រចាំនៅកម្ពុជា និងត្រូវចេះភាសាអង់គ្លេសល្អបង្គួរ ព្រោះការសិក្សា និងគ្រប់គម្រោងស្រាវជ្រាវទាំងអស់ត្រូវធ្វើឡើងជាភាសាអង់គ្លេស។

ទោះយ៉ាងណា បូរិន បានរៀបរាប់ពីការលំបាករបស់ខ្លួនខ្លះៗថា កត្តាភាសាគឺជាការលំបាកមួយ ព្រោះរាល់ការប្រាស្រ័យទាក់ទងជាមួយប្រជាជន នៅក្នុងតំបន់ភាគច្រើនពួកគាត់និយមប្រើប្រាស់ភាសាជប៉ុនជាគោល។ការលំបាកទី២ គឺអាកាសធាតុ ខណៈនៅកម្ពុជាមានសីតុណ្ហភាពជាមធ្យម៣៧ ទៅ៣៨ អង្សារ តែសម្រាប់ប្រទេសជប៉ុនវិញមានសីតុណ្ហភាពចន្លោះពី៧ទៅ១០ អង្សារ ដែលពីដំបូងធ្វើឲ្យត្រជាក់ខ្លាំងពិបាកទ្រាំ។ការលំបាកចុងក្រោយគឺម្ហូបអាហារ។ម្ហូបជប៉ុន មានរស់ជាតិខុសប្លែកពីម្ហូបខ្មែរ ដូច្នេះមានការលំបាកបន្តិចពេលមកដល់មួយខែដំបូង។តែមកដល់ឥឡូវ អាចញ៉ាំបានស្ទើរគ្រប់មុខម្ហូបទៅហើយ៕

Source : sabay

មុនបានអាហារូបករណ៍បរទេសខ្ញុំធ្លាប់ជាសិស្សគេចសាលា និងញៀនបាល់

5:58 AM Key Success, Life and Social No comments

ក្នុងវ័យ ២៦ ឆ្នាំ យុវជន តែ រតនៈ បច្ចុប្បន្នគឺជានិស្សិតអាហារូបករណ៍កំពុងបន្តការសិក្សាថ្នាក់អនុបណ្ឌិតនៅប្រទេស អេស្តូនី លើមុខជំនាញគ្រប់គ្រងបច្ចេកវិទ្យា និងអភិវឌ្ឍសេដ្ឋកិច្ច បន្ទាប់ពីបញ្ចប់ការសិក្សាអាហារូបករណ៍នៅប្រទេសចិនលើជំនាញគ្រប់គ្រងពាណិជ្ជកម្ម។

រតនៈ បានរំលឹកថា ដើមឡើយរូបគេធ្លាប់ជាអតីតសិស្សមួយរូបងប់ងុលនឹងកីឡាបាត់ទាត់ បាល់ទះ គេចសាលារហូតចំណាយពេលស្ទើរទាំងស្រុងពីការសិក្សាដើម្បីលេងកីឡា។ ដូច្នេះតើកត្តាអ្វី ដែលធ្វើឲ្យយុវជនរូបនេះផ្លាស់ប្ដូរ ហើយក្លាយខ្លួនជានិស្សិតឆ្នើមបែបនេះទៅវិញ?។

មានស្រុកកំណើត នៅភូមិវត្ត ឃុំវត្ត ស្រុកចិត្របុរី ខេត្តក្រចេះ រតនៈគឺជាកូនច្បងគេ ក្នុងចំណោមបងប្អូនចំនួន៤ នាក់ ដែលឪពុកម្ដាយគឺជាអាជីវករលក់ដូរបន្តិចបន្តួចនៅផ្ទះ។

អំឡុងឆ្នាំ២០០២ ក្រោយបញ្ចប់អនុវិទ្យាល័យក្រចេះក្រុង រតនៈបានចូលសិក្សានៅវិទ្យាល័យព្រះកុសុមៈ ដោយបានចំណាយពេលវេលាជាច្រើននឹងការលេងកីឡាបាល់ ទាត់ និងបាល់ទះ ភ្លេចការសិក្សា។

រតនៈ បានរៀបរាប់បន្តថា នៅថ្ងៃទី៨ ខែសីហា ឆ្នាំ២០០៥ បានមកដល់ ជាថ្ងៃប្រលងថ្នាក់ជាតិ រូបគេក៏ដូចជាសិស្សផេ្សងៗទៀតដែរ បានខិតខំប្រលងយ៉ាងសស្រាក់សស្រាំ ប៉ុន្តែលទ្ធចេញមកធ្វើឲ្យប្អូនអស់សង្ឃឹមយ៉ាងខ្លាំង នោះមិនមែនមានន័យថាប្អូន ប្រលងធ្លាក់ទេ តែលទ្ធផល ដែលបានត្រឹមនិទ្ទេស D នេះ ធ្វើឲ្យ រតនៈ កាន់តែខ្មាសគេខ្លាំងទៅវិញ ដោយសារតែមិត្តភ័ក្ដិជាច្រើនបាននិទ្ទេសល្អ។ រតនៈ និយាយថា”និទ្ទេសនេះ ខ្ញុំមិនបានទទួលអាហារូបករណ៍ពីសាកលវិទ្យាល័យណាមួយឡើយ រួចខ្ញុំក៏បានសួរខ្លួនឯងថា គួរធ្វើអ្វីបន្ត?”។

រតនៈ បានសម្រេចចិត្តមកទីក្រុងភ្នំពេញ ហើយចុះឈ្មោះចូលរៀនបង់ថ្លៃនៅសកលវិទ្យាល័យភូមិន្ទភ្នំពេញផ្នែកវិទ្យាសាស្ត្រកុំព្យូទ័រ តាមការណែនាំពីសំណាក់បងប្អូន និងមិត្តភ័ក្ដិមួយចំនួន ។” ឆ្នាំ២០០៩ ប្អូនក៏បានបញ្ចប់ការសិក្សាបរិញ្ញាបត្រ ប៉ុន្តែពិន្ទុមធ្យមភាគគឺទាបមែនទែន(GPA <3.0)។ វាគឺជាបរាជ័យលើកទី២ បន្ទាប់ពីការប្រលងបាក់ឌុប ។រតនៈ បន្ថែម។ តែអាចចាត់ទុកថាជាសំណាងរបស់ខ្លួន រតនៈ បានរៀនភាសាអង់គ្លេសមួយរយៈ នៅវិទ្យាស្ថានភាសាបរទេស(IFL) ក្រោយមកក៏បានសម្ភាសន៍ជាប់ចូលបម្រើការងារនៅធនាគារANZ Royal Bank ។ ធ្វើការងារនៅទីនោះ រតនៈ បានស្គាល់មនុស្សជាច្រើនរួមមាន មិត្តរូមការងារ អ្នកគ្រប់គ្រងតាមផ្នែកនិមួយៗ និងបានរៀនសូត្រពីរបៀបធ្វើការងារពីបុគ្គលិកមួយចំនួន។

ពេលនោះហើយ ដែលរតនៈចាប់ផ្ដើមមានចំណង់ចំណូលចិត្ត ផ្នែកជំនួញ និងគ្រប់គ្រងធនធានមនុស្ស ហើយគិតថា តើត្រូវប្តូរមុខជំនាញពីកុំព្យូទ័រជាគ្រប់គ្រង ដោយវិធីណា?”។ ពេល នោះគំនិតមួយបាន ផុសឡើង គឺមានតែដាក់អាហារូបករណ៍ទៅបរទេសទេ ទើបអាចសម្រេចការស្រម៉ៃនេះបាន។ ប៉ុន្តែទន្ទឹមនឹងនោះ រតនៈក៏សួរខ្លួនថា តើទៅ ដោយរបៀបណា បើខ្លួនមិនមែនជាសិស្សពូកែផង?

នេះគឺជាការសុបិនទាំងថ្ងៃ ព្រោះវាជារឿងមួយលំបាកណាស់ ក្នុងការទទួលបានអាហារូបករណ៍ទៅសិក្សានៅបរទេស ។ អាហារូបករណ៍នៅក្នុងស្រុកខ្លួនមិនជាប់ផង ចុះទម្រាំបរទេសទៀត ពិតជាការស្រមើស្រ ម៉ៃពេកហើយ រតនៈ អើយ។

រតនៈ បានបញ្ជាក់ថា ជាទូទៅអាហារូបករណ៍មានពីរប្រភេទ ប្រភេទទី១ គឺអាហារូបករណ៍ តាមអ៊ីនធឺណិត(Online Scholarship) ដែលតម្រូវឲ្យបេក្ខជនផ្ញើសំណុំបែបបទទៅអ្នកផ្ដល់អាហារូបករណ៍ ។សំណុំបែបបទ អាហារូបករណ៍ ដែលត្រូវផ្ញើទៅរួមមាន សញ្ញាប័ត្របញ្ចប់ការសិក្សា(Diploma) ព្រឹត្តិបត្រពិន្ទុខ្ពស់(Transcript: GPA>3.5)លិខិតណែនាំពីសាស្ត្រាចារ្យ(Letter of recommendation ) ថ្លៃដាក់ពាក្យ(Application Fee)ពិន្ទុអង់គ្លេស(Official English Score:TOEFLE/IELTs) លិខិតបញ្ជាក់ពីការប្ដេជ្ញាចិត្ត (Letter of Motivation) គម្រោង ដែលត្រូវទៅធ្វើការស្រាវជ្រាវ(Research Proposal)ជាដើម។

រតនៈ និយាយថា ចំណុចទាំងអស់នេះបើក្រឡេកមើលពីសមត្ថភាពរបស់ខ្លួន គឺពិតជាមិនអាចទៅរួចទាល់តែសោះ ព្រោះព្រឹត្តិបត្រពិន្ទុទាបមែនទែន(GPA<3) ហើយពិន្ទុភាសាអង់គ្លេសទៀតសោត(TOEFLE/IELTs)ក៏មិនទាន់មាន ព្រោះគ្មានប្រាក់ទៅប្រលង ដែលត្រូវចំណាយប្រហែល១៧០ដុល្លារ។

ប៉ុន្តែកត្តាឧបសគ្គខាងលើមិនបានធ្វើឲ្យ រតនៈ អស់សង្ឃឹមទេ ព្រោះអាហារូបករណ៍ប្រភេទទី២ មិនតម្រូវឲ្យផ្ញើរសំណុំបែបបទទាំងនោះទេ។ ជាដំបូងត្រូវទៅទិញពាក្យប្រលងនៅនាយកដ្ឋានអាហារូបករណ៍ ហើយដាក់ពាក្យជាមួយ និងសញ្ញាប័ត្របញ្ចប់ការសិក្សា រួចរង់ចាំថ្ងៃប្រលង ដែលរៀបចំ ដោយក្រសួងអប់រំយុវជន និងកីឡា។

រតនៈ បានរៀបរាប់ទៀតថា “ខ្ញុំរៀនមិនពូកែតាំងពីថ្នាក់វិទ្យាល័យ រហូតមកដល់មហាវិទ្យាល័យ ប៉ុន្តែដោយសារតែចង់បានអាហារូបករណ៍ទៅរៀននៅបរទេស មុនពេលប្រលងប្រហែលជា៣ ខែខ្ញុំបានចាប់ផ្ដើមមើលសៀវភៅទាក់ទងនឹងចំណេះដឹងទូទៅ ប្រឹងរៀនភាសាអង់គ្លេស ទាំងការនិយាយ និងសរសេរ។មិនតែប៉ុណ្ណោះខ្ញុំបានសុំការណែនាំពីមិត្តភ័ក្ដិ អ្នកគ្រូលោកគ្រូ ដែលមានបទពិសោធន៍ ក៏ដូចជារស់នៅបរទេស ដើម្បីត្រៀមខ្លួនឲ្យបានល្អ”។ រតនៈ និយាយថា សម្រាប់ភាសាអង់គ្លេសមិនសូវចោទជាញ្ហាប៉ុន្មានទេ គួបផ្សំនឹងការសិក្សានៅវិទ្យាស្ថានភាសាបរទេសបានខ្លះ ព្រោះឪពុកម្ដាយប្អូនបានជំរុញតាំងពីនៅខេត្តមកម្ល៉េះ ។

ថ្ងៃប្រកាសលទ្ធផលបានមកដល់គឺជាអ្វី ដែល រតនៈ ស្ទើរមិនជឿថាបានប្រលងជាប់លេខ២ ក្នុងចំណោមបេក្ខជន១៥ នាក់ ដែលត្រូវបានជ្រើសរើស។ ក្រោយពីបានសម្ភាសន៍ជាមួយមន្ត្រីទូតចិន រតនៈ ក៏បានជាប់ជាស្ថាពរ។

នៅចុងខែសីហា ឆ្នាំ២០១០ រតនៈ បានចេញទៅបន្តការសិក្សានៅទីក្រុងប៉េកាំង ប្រទេសចិន នៅ University of Science and Technology Beijing ផ្នែកគ្រប់គ្រងពាណិជ្ជកម្ម។ ពេលទៅដល់ប្រទេសចិនដំបូង មានការលំបាកជាខ្លាំង ព្រោះនៅប្រទេសចិនកម្រនិយាយភាសាអង់គ្លេសណាស់ ឯអាកាសធាតុវិញត្រជាក់ក្រោមសូន្យអង្សា ធ្លាក់ទឹកកក ហើយបើអាហារវិញក៏ពិបាកញ៉ាំទៀត។ ទោះយ៉ាងណាប្រាក់អាហារូបករណ៍គឺគ្រប់គ្រាន់សម្រាប់ការរស់នៅយ៉ាងសមរម្យ គឺ១៧០០ យន់ ក្នុងមួយខែ។

រតនៈ និយាយថា “មិនយូរប៉ុន្មាន ខ្ញុំក៏អាចសម្របខ្លួនបាន ហើយមានទំនាក់ទំនងល្អជាមួយសាស្ត្រាចារ្យ និងមិត្តរូមថ្នាក់ ដែលមកពីគ្រប់ទិសទី ក្នុងសាកលលោក ទន្ទឹមគ្នានោះការសិក្សាក៏មានការវិវឌ្ឍគួរឲ្យកត់សំគាល់ រហូតទទួលបានរង្វាន់ដូចជា Excellent International Student Award, Excellent Article Publication, Excellent Thesis Presentation ហើយទទួលបានសញ្ញាប័ត្រអនុបណ្ឌិតផ្នែកគ្រប់គ្រងពាណិជ្ជកម្ម(MBA) នៅខែកក្កដាឆ្នាំ២០១២”។ រតនៈ បន្ថែមថា “ជាមួយនឹងភាពជោគជ័យនេះ រង្វាន់ ដែលខ្ញុំទទួលបាន និងព្រឹត្តិបត្រពិន្ទុល្អ(GPA=3.8 ខ្ញុំក៏កាន់តែមានទំនុកចិត្តកាន់តែខ្លាំង ហើយចង់ដឹងថាការអប់រំនៅអឺរ៉ុប ខុសប្លែកពីប្រទេសនៅអាស៊ីប៉ុណ្ណា ខ្ញុំក៏បានដាក់ពាក្យប្រកួតប្រជែងយកអាហារូបករណ៍អនុបណ្ឌិតមួយទៀតតាមរយៈអ៊ីនធឺណិត ដែលផ្ដល់ដោយ Ragar Nurkse School of Innovation and Governance នៃ Tallinn University of Technology នៅប្រទេសអេស្តូនី(អឺរ៉ុបខាងជើង) ដែលស្ថិតនៅសហភាពអឺរ៉ុប”។

ការដាក់ពាក្យតម្រូវឲ្យមានពិន្ទុអង់គ្លេស (TOEFLE/IELTs)។ ប៉ុន្តែដោយសារតែការសិក្សានៅប្រទេសចិន ធ្វើឡើងជាភាសាអង់គ្លេសសុទ្ធ ទើបគណៈកម្មការលើកលែងសម្រាប់តម្រូវការនោះ។ប្អូនបានផ្ញើសំណុំបែបបទទៅប្រទេសអេស្តូនី និងឆ្លងកាត់ការសម្ភាសន៍ជាមួយគណៈកម្មការអាហារូបករណ៍ រតនៈ គឹជាបេក្ខ ជនតែម្នាក់គត់ ដែលត្រូវបានជ្រើសរើសសម្រាប់កម្មវិធីអនុបណ្ឌិតគ្រប់គ្រងបច្ចេកវិជ្ជា និងសេដ្ឋកិច្ចអភិវឌ្ឍន៍(Technology Governance Innovation and Development Economics) ក្នុងចំណោមបេក្ខជនជាច្រើនរយនាក់ទូទាំងពិភពលោក។ប្រាក់អាហារូបករណ៍ប្រហែល ១០០០០ ដុល្លារ ក្នុងមួយឆ្នាំ ហើយចំនួននេះក៏គ្រប់គ្រាន់សម្រាប់ការចំណាយផ្សេងៗប្រចាំថ្ងៃ ហើយចំពោះផលលំបាកវិញមិនខុសពីប្រទេសចិនទេ ប៉ុន្តែស្រួលបន្តិចត្រង់ថាប្រជាជនគេនិយាយភាសាអង់គ្លេស។ផលលំបាកមួយទៀតគឺ ប្អូនជានិស្សិតខ្មែរតែម្នាក់គត់ នៅទីនេះ ដែលធ្វើឲ្យតប់ប្រមល់ពេលខ្លះ មិនដូចនៅប្រទេសចិន ដែលមានមិត្តភ័ក្ដិខ្មែរច្រើន។

សិក្សានៅប្រទេសអេស្តូនី រតនៈ ទទួលបានពិន្ទុល្អ(GPA>3.7)ហើយក៏អាចមានឱកាសដាក់អាហារូបករណ៍ (Erasmus scholarship) បន្ទាប់ពី សម្ភាសជាមួយគណៈកម្មការជ្រើសរើស រតនៈ ក៏បានជាប់អាហារូបករណ៍សិក្សានៅ Ruhr University Bochum ប្រទេសអាល្លឺម៉ង់ ដែលនឹងត្រូវចាកចេញទៅសិក្សានៅខែ តុលា ឆ្នាំ ២០១៣ ខាងមុខ។

គោលបំណងទៅថ្ងៃអនាគត ក្រោយបញ្ចប់ការសិក្សា រតនៈ ចង់ក្លាយជាសាស្ត្រាចារ្យម្នាក់ ដោយអាចចែករំលែកបទពិសោធន៍ ដែលខ្លួនបានឆ្លងកាត់ កន្លងមកឲ្យប្អូនៗជំនាន់ក្រោយបានចេះដឹង និងមើលឃើញបានវែងឆ្ងាយ។ ក្រៅពីនេះក៏ចង់ចូលធ្វើការងារនៅតាមស្ថាប័នក៏ដូចជាអង្គការ ដែលមានគោលដៅលើកកម្ពស់ការអប់រំ និងការអភិវឌ្ឍន៍ ក្នុងប្រទេសកម្ពុជាផងដែរ។ រតនៈ និយាយទៀតថា “អ្វីដែលខ្ញុំចង់ចែករំលែកមួយទៀតនោះគឺ ទោះបីជាខ្ញុំធ្លាប់ជាសិស្សរៀនខ្សោយ តាំងពីថ្នាក់ក្រោយរហូតដល់មហាវិទ្យាល័យ ក៏យើងអាចវិវត្តន៍ខ្លួនយើង ហើយនិងទទួលបានអាហារូបករណ៍ ទៅសិក្សានៅបរទេសបានដែរ តាមរយៈការតាំងចិត្ត និងការស្រ ម៉ៃ ការរស់នៅជាមួយក្តីសង្ឃឹមជានិច្ចទោះជារស់នៅស្ថិត ក្នុងកាលៈទេសៈណាក៏ដោយ”។

ម្យ៉ាងយើងត្រូវស្វែងយល់ពី សមត្ថភាព ភាពខ្លាំង និងភាពខ្សោយរបស់យើង ហើយកំណត់ថាអាហារូបករណ៍ប្រភេទណាសក្ដិសម នឹងខ្លួនយើង។បន្ទាប់មកយើងស្វែងយល់ពីមធ្យោបាយ ក្នុងការប្រលងក៏ដូចជាដាក់ពាក្យប្រលង។ ជាក់ស្ដែងនិស្សិតខ្លះគាត់រៀនមិនពូកែ ប៉ុន្តែគាត់ចង់ទៅអឺរ៉ុប អាមេរិក អូស្ត្រាលី ។ វាពិតជារឿងលំបាកណាស់ ។ប៉ុន្តែគាត់អាចធ្វើបាន ដោយការអភិវឌ្ឍន៍ ខ្លួនបន្តិចម្ដង តាមរយៈការសិក្សានៅប្រទេសជិតខាង ដែលមានការប្រកួតប្រជែងមានលក្ខណៈធូរស្រាលជាង។រៀនសូត្រពីអ្នកនៅជុំវិញខ្លួន ដែលធ្លាប់រៀននៅបរទេស ជាកត្តាមួយដ៏សំខាន់ផងដែរ។ខ្ញុំអាចមករៀននៅអឺរ៉ុប និងអាចទទួលបានអាហា រូបករណ៍កន្លង មកដោយមិនមានពិន្ទុអង់គ្លេសផ្លូវការ(TOEFLE/IELTs) ព្រោះខ្ញុំគ្មានប្រាក់សម្រាប់ចំណាយការប្រលង ប៉ុន្តែអ្នកគ្រប់គ្នាក៏អាចធ្វើបាន ដូចខ្ញុំដែរ តាមរយៈបទពិសោធន៍ ដែលខ្ញុំចែករំលែកខាងលើ។

មួយវិញទៀតយើងត្រូវចេះប្រើប្រាស់បណ្ដាញសង្គមដូចជា Facebook, Twitter ,Linkedin ឲ្យមានប្រយោជន៍ ដើម្បីតាមដានព័ត៌មានអាហារូបករណ៍។ គណៈកម្មការ ដែលបានជ្រើសរើសខ្ញុំមករៀននៅអឺរ៉ុបបានប្រាប់ខ្ញុំថា នេះជាយុគសម័យអ៊ីនធឺណិត ពេលគេជ្រើសរើសនិស្សិតណាម្នាក់ គេតែងតែស្វែងរកព័ត៌មានខ្លះៗ របស់ពួកគេតាមអ៊ីនធឺណិត ហើយច្បាស់ណាស់គេនឹងឃើញគណនេយ្យ Facebook របស់ពួកយើង។ ដូច្នេះការប្រើ ប្រាស់ក៏ដូចជាដាក់រូប Profile Picture or Cover Photos ត្រូវមានការប្រុងប្រយ័ត្ន ព្រោះវាតំណាងឲ្យអត្តចរិតរបស់មនុស្សម្នាក់ៗ ជៀសវាងដាក់រូបមិនសមរម្យ ផឹកស៊ីតាមក្លឹប ជាដើម ដែលនាំឲ្យយើងបាត់បង់ឱកាសជាច្រើនក្នុងការទទួលបានអាហារូបករណ៍ និងការងារតាមក្រុមហ៊ុន និងស្ថាប័នផ្សេងៗ”៕

តិកនិករៀនត្រៀមមុនថ្ងៃប្រឡងដែលត្រូវយល់ដឹង

5:26 AM Short Key

ឲ្យតែជិតដល់ពេលប្រឡង អ្នកតែងតែខំប្រឹងទន្ទេញមេរៀនយ៉ាងមមាញឹករហូតពេលខ្លះដាច់បាយដាច់ទឹកក៏មាន។ អ្នកខ្លះខំពេកក៏ធ្វើឲ្យឈឺ អ្នកខ្លះខំដែរតែខំប្រឹងចម្លងឯកសារទុកបើកចាក់។ សិស្សភាគច្រើនតែងរអ៊ូថាមើលមេរៀនមិនចាំ ហើយមិនដឹងធ្វើម៉េចឲ្យចាំមេរៀនសម្រាប់ថ្ងៃប្រឡង។ ប៉ុន្តែថ្ងៃនេះ អ្នកឈប់បារម្ភទៀតទៅ ព្រោះត្រឹមតែប៉ុន្មានចំណុចខាងក្រោមអាចនឹងជួយអ្នកត្រៀមខ្លួនបានយ៉ាងល្អមុនថ្ងៃប្រឡងចូលមកដល់។

១. គូសវាសនៅលើក្រដាសតូចៗ៖

មុននឹងដល់ថ្ងៃប្រឡង អ្នកត្រូវសរសេរអ្វីដែលអ្នកអាចចាំបានទាក់ទងនឹងមុខវិជ្ជាដែលត្រូវប្រឡងលើក្រដាសតូចៗ។ បន្ទាប់មក ពិនិត្យមើលថាតើមានចំណុចណាខ្លះដែលអ្នកមិនចាំ។ បើមិនចាំ អ្នកអាចត្រលប់ទៅបើកសៀវភៅម្តងទៀតដើម្បីរំលឹកចំណុចទាំងនោះឡើងវិញ។

២. សរសេររូបមន្តជាមុន៖

អ្នកគួរសរសេររូបមន្ត សមីការ ឬទ្រឹស្តីណាដែលពាក់ព័ន្ធទុកម្តុំ ដើម្បីងាយស្រួលដល់ពេលអ្នកត្រូវការទាញមកមើលសម្រាប់ត្រៀមប្រឡង។

៣. គូសដ្យាក្រាម៖

គូសដ្យាក្រាមសាមញ្ញៗ និងងាយយល់ដើម្បីអាចពន្យល់ទៅអ្នកដទៃដែលមិនដែលរៀនមុខវិជ្ជានេះបាន។ ធ្វើដូចនេះអាចជួយឲ្យប្រធានបទរបស់អ្នកក្លាយជាងាយយល់ និងងាយចាំបានល្អ។

៤. សម្រាកឲ្យបានគ្រប់គ្រាន់៖

អ្នកគួរសម្រាកឲ្យបានគ្រប់គ្រាន់ ព្រោះការសម្រាកជួយឲ្យខួរក្បាលរបស់អ្នកចងចាំបានល្អ។ ប្រសិនបើអ្នកសម្រាកមិនបានគ្រប់គ្រាន់ទេនោះ ហាក់ដូចជាអ្នកកំពុងដាក់បន្ទុកធ្ងន់ធ្ងរឲ្យខួរក្បាលរបស់អ្នកធ្វើការមិនឈប់ដូច្នោះដែរ។ ដូចនេះ អ្នកត្រូវចេះលៃពេលណាត្រូវមើលមេរៀន និងពេលសម្រាកឲ្យបានគ្រប់គ្រាន់។

៥. Highlight ចំណុចណាដែលសំខាន់៖

ប្រើប៊ិចhighlight ពណ៌ចម្រុះដើម្បីឲ្យអ្នកអាចមើលឃើញចំណុចសំខាន់ក្នុងមេរៀននោះបានងាយជាមួយពណ៌ឆើតៗទាំងនោះ។ ដោយការធ្វើបែបនេះ អ្នកអាចនឹងនឹកឃើញចំណុចទាំងនោះ និងចំណុចដែលនៅក្បែរនោះនៅពេលប្រឡងបានផងដែរ។

៦. រៀនដើម្បីចេះ មិនមែនរៀនដើម្បីជាប់នោះទេ៖

ការប្រឡងពិតជាសំខាន់ហើយ ប៉ុន្តែអ្វីដែលសំខាន់ជាងនេះទៀតនោះគឺរៀនឲ្យខ្លួនអ្នកចេះ និងយល់ពីអ្វីដែលអ្នកបានរៀន ព្រោះអ្នកនឹងត្រូវការប្រើអ្វីដែលចេះនោះទៅធ្វើការងារ។ ដូច្នេះ បើរៀនគ្រាន់តែចង់ឲ្យជាប់នោះ គឺមិនអាចប្រើការបានទេ។

៧. រៀនជាក្រុម៖

វាគ្មានអ្វីប្លែកទេ ដែលអ្នកអាចចែករំលែកអ្វីដែលអ្នកចេះជាមួយមិត្តភក្តិផ្សេងទៀត។ ការរៀនជាក្រុមអាចជួយអ្នកឲ្យទទួលបានចំណេះដឹងបន្ថែម ហើយពេលខ្លះអ្នកអាចដឹងចំណុចខ្លះដែលអ្នកមិនដែលគិតដល់ក៏ថាបាន។

អ្នកអាចយកវិធីងាយៗខាងលើទៅអនុវត្តនៅមុនពេលប្រឡង បើទោះបីវាមិនអាចត្រូវសម្រាប់មនុស្សគ្រប់គ្នាក៏ដោយ តែមានចំណុចខ្លះក៏អាចជួយអ្នកបានដែរតើ! សាកមើលទៅបើមិនជឿ។

Source : sabay

ការស្លៀកពាក់៥យ៉ាងដែលត្រូវជៀសវាងក្នុងរដូវភ្លៀង

2:31 AM Healthy

ពេលនេះរដូវភ្លៀងបានមកដល់ហើយ តើលោកអ្នកបានជ្រាបហើយឬនៅថាត្រូវជៀសវាងការស្លៀកសំលៀកពាក់បែបណាទើបជាការប្រសើរ ដើម្បីការពារខ្លួននៅក្នុងរដូវវស្សានេះ?

ជាការពិតមានប្រិយមិត្តមួយចំនួនពិតជាបានជ្រាបរួចហើយលើបញ្ហានេះ ក៏ប៉ុន្តែជាការរួមចំណែកបន្ថែមSabay សូមផ្ដល់ជួនមិត្តអ្នកអានទាំងអស់ឲ្យស្វែងយល់ពីសំលៀកបំពាក់៥យ៉ាងដែលលោកអ្នកគូរជៀសវាងស្លៀកពាក់នៅក្នុងរដូវភ្លៀងដូចខាងក្រោមនេះ៖

១ ស្បែកជើងផ្ទាត់

ជាទូទៅលោកអ្នកប្រហែលជាធ្លាប់គិតហើយថា ស្បែកជើងផ្ទាត់គឺពិតជាស័ក្ដិសមសម្រាប់រដូវភ្លៀងនេះ ព្រោះវាអាចផ្ដល់ភាពងាយស្រួលនៅពេលធ្វើដំណើរឆ្លងកាត់ទឹក អាចធន់នឹងទឹកភ្លៀងទៀតផង ។ ក៏ប៉ុន្តែលោកអ្នកមានដឹងទេថា នៅពេលដែលជើងរបស់លោកអ្នកមានសំណើម តើនឹងមានអ្វីកើតឡើង? ជាការពិតសំណើមឬ ដីប្រឡាក់គឺមិនអាចជៀសផុតបានឡើយនៅពេលលោកអ្នកពាក់ស្បែកជើងផ្ទាត់ ហើយនោះមេរោគទាំងឡាយនឹងមកតោងជើងរបស់អ្នក។ ដូច្នេះការពាក់ស្បែកជើងដែលបិទជិត មិនជ្រាបទឹកគឺជាជម្រើសដ៏ល្អបំផុតនៅពេលនេះ។

២ ស្បែកជើងប៊ូស្បែក

ស្បែកជើងប៊ូ ឬកាបូបដែលផលិតចេញពីស្បែក អាចជាជម្រើសល្អសម្រាប់អ្នក ព្រោះថាវាធន់ និងអាចប្រើប្រាស់បានយូរ។ ប៉ុន្តែរបស់ទាំងនេះ ក៏មានចំណុចខ្សោយរបស់វាដែរ ហើយនោះគឺការប៉ះទឹកដែលមាននៅក្នុងរដូវភ្លៀងនេះ។ ដូច្នេះលោកអ្នក ត្រូវជ្រើសរើសស្បែកជើងដែលផលិតចេញពីជ័រឬក្រណាត់ ព្រោះវាអាចធន់នឹងទឹកភ្លៀងបាន ហើយបើមិនចង់ឲ្យស្បែកជើងដ៏ថ្លៃរបស់អ្នកឆាប់ខូចទេនោះ លោកអ្នកត្រូវតែទុកវាមួយឡែកសិនហើយនៅក្នុងរដូវនេះ។

៣ ខោខាវប៊យ

យុវវ័យពិតជាពេញនិយមស្លៀកខោខាវប៊យតាមបែបសម័យថ្មី ដែលភាគច្រើនអាចនិយាយថា ស្ទើររាល់ពេលដែលចេញទៅក្រៅ ឬ ដើរលំហែកម្សាន្តនៅកន្លែងណាមួយព្រោះថា វាធន់មិនឆាប់រហែកនិងងាយស្រូលសម្រាប់ស្លៀកពាក់ទៀតផង។ ក៏ប៉ុន្តែលោកអ្នកមានធ្លាប់កត់សម្គាល់ដែរទេថា ពេលវាប៉ះសំណើមឬ ទឹកភ្លៀងខោខាវប៊យរបស់លោកអ្នកនឹងទៅជាយ៉ាងណា? ការពិតវានឹងអាចរបូតចេញពីចង្កេះលោកអ្នកដោយសារទម្ងន់ទឹកភ្លៀង។ ដូចច្នេះ ជាការប្រសើរលោកអ្នកត្រូវតែទុកវាមួយកន្លែងសិនហើយ។

៤ សំលៀកបំពាក់ពណ៌ស

សម្រាប់ប្រិយមិត្តមួយចំនួនដែលមិននិយមស្លៀកសំលៀកបំពាក់ពណ៌សគឺជាការប្រសើរ នៅរដូវក្ដៅ។ ក៏ប៉ុន្តែសម្រាប់ប្រិយមិត្តដែលចូលចិត្តស្លៀកសំលៀកបំពាក់បែបនេះនៅក្នុងរដូវភ្លៀងគឺពិតជាវីវរធំហើយ ព្រោះថាដំណក់ទឹកភ្លៀងនឹងជ្រាបចូលក្រណាត់ខោអាវរបស់អ្នក ងាយនឹងប្រឡាក់បន្ទាប់ពីធ្វើដំណើរកាត់ភ្លៀង ហើយបើជាសុភាពនារីវិញច្បាស់ជាលេចចេញសាច់សខ្ចីឲ្យគេមើលជាមិនខាន។ ដូច្នេះ ជម្រើសដ៏ល្អមួយ លោកអ្នកគួរតែស្លៀកសំលៀកបំពាក់ណាដែលស័ក្ដិសមនឹងរដូវភ្លៀង លើកលែងតែពណ៌សនេះចេញទៅ គឺគ្រប់គ្រាន់ហើយ។

៥ ឆត្រពណ៌ផ្កាឈូក

វាជារឿងមិនល្អនៅពេលនេះ សម្រាប់សុភាពបុរសទាំងឡាយ ដែលទាញឆត្រពណ៌ផ្កាឈូកមកទទូរភ្លៀង ស្របពេលដែលវាស័ក្ដិសមបំផុតសម្រាប់លើកសម្រស់តែសុភាពនារីនោះ។ដូច្នេះ នៅចាំអីទៀត ទិញឆត្រពណ៌ប្រផេះ ឬ បើបានពណ៌ខ្មៅរឹតតែល្អ ព្រោះថាពណ៌ទាំងនេះ វាមិនងាយប្រឡាក់ហើយស័ក្ដិសមនឹងលោកអ្នកជាបុរសទៀតផង៕

Source : sabay

កូរ៉េខាងត្បូងតែងតាំងគ្រូបង្វឹកថ្មីត្រៀម World Cup ឆ្នាំក្រោយ

2:27 AM Sports News

ទោះបីជាបញ្ចប់វគ្គជម្រុះ World Cup ដោយជោគជ័យក៏ដោយ ក៏ក្រុមបាល់ទាត់ជម្រើសជាតិកូរ៉េខាងត្បូងបានសម្រេចតែងតាំងគ្រូបង្វឹកថ្មីហើយកាលពីព្រឹកម៉ិញនេះ (ថ្ងៃចន្ទ ទី២៤ មិថុនា)។

មិនខុសពីគ្រូបង្វឹកចាស់នោះទេ គ្រូបង្វឹកថ្មីជាជនជាតិកូរ៉េខាងត្បូង ហើយក៏ជាអតីតប្រធានក្រុមបាល់ទាត់ជម្រើសនេះផងដែរនោះ គឺលោក Hong Myung-bo។ បុរសដែលត្រូវបានគេចាត់ទុកថាជាវីរបុរសរបស់កូរ៉េខាងត្បូង និងជាកីឡាករល្អបំផុតម្នាក់ក្នុងចំណោមកីឡាករបំផុតនានាក្នុងតំបន់អាស៊ីរូបនេះ ធ្លាប់បានជួយឲ្យកូរ៉េខាងត្បូងបានលេខ៤ World Cup 2002 លើទឹកដីខ្លួនឯង ហើយក៏បានឈ្នះពានរង្វាន់បាល់សំរឹទ្ធនាពេលនោះទៀតផង។

ក្រោយចូលនិវត្តន៍ពីទីលានបាល់ទាត់កាលពីឆ្នាំ២០០៤មក លោកបានចូលរួមបង្វឹកក្រុមយុវជនមួយចំនួននៅកូរ៉េខាងត្បូង ក៏ដូចជាដឹកនាំក្រុម U-23 ប្រទេសនេះ ឲ្យឈ្នះមេដាយសំរឹទ្ធនៅអូឡាំពិក ឆ្នាំ២០១២ផងដែរ។

លោក Hong Myung-bo (ទី២រាប់ពីស្ដាំ) ពេលដឹកនាំក្រុម U-23 កូរ៉េខាងត្បូង នៅអូឡាំពិក ២០១២

កំណត់ត្រាដ៏ល្អនេះ គឺល្មមគ្រប់គ្រាន់ឲ្យសហព័ន្ធកីឡាបាល់ទាត់ប្រទេសកូរ៉េខាងត្បូង (KFA) សម្រេចជ្រើសរើសលោកជាគ្រូបង្វឹកថ្មី ជំនួសលោក Choi Kang-hee។ ទោះបីដឹកនាំកូរ៉េខាងត្បូង ឲ្យឆ្លងផុតវគ្គជម្រុះ World Cup ក៏ពិតមែន ប៉ុន្តែលោក Choi មិនបានដឹកនាំក្រុមនេះឲ្យទទួលលទ្ធផលល្អប៉ុន្មានទេ ពោលគឺស្ថិតនៅលេខ២ក្នុងពូល បន្ទាប់ពីចាញ់អ៊ីរ៉ាក់ថ្ងៃចុងក្រោយ ហើយនៅលើអ៊ូបេគីស្ថានទាំងប្រផុតប្រផើយបំផុត (ពិន្ទុស្មើ តែឈ្នះគ្រាប់បាល់)។

Hong Myung-bo បានចុះកិច្ចសន្យារយៈពេល២ឆ្នាំ ដែលមានន័យថាលោកនឹងត្រូវដឹកនាំក្រុមខ្លាំងប្រចាំតំបន់អាស៊ីមួយនេះទៅប្រកួត World Cup 2014 នៅប្រេស៊ីល និង AFC Asian Cup ឆ្នាំ២០១៥។ គ្រូបង្វឹកវ័យ៤៤ឆ្នាំរូបនេះ នៅតែជាប់ឈ្មោះជាកីឡាករដែលបង្ហាញខ្លួនច្រើនជាងគេក្នុងជម្រើសជាតិកូរ៉េខាងត្បូងដដែលគិតមកទល់ពេលនេះ ពោលគឺបានបង្ហាញខ្លួន ១៣៦ប្រកួត បូករួមទាំងកំណត់ត្រាកីឡាករនៅអាស៊ីទី១ ដែលបង្ហាញខ្លួននៅ World Cup ៤ដងជាប់ៗគ្នា៕

ចាំមើលមើល៍ ថាតើលោក Hong Myung-bo អាចដឹកនាំបានល្អជាងគ្រូបង្វឹកចាស់ដែរឬទេ?

source : sabay

Aspas និង Alberto ចូល Liverpool ជាផ្លូវការ

2:26 AM Sports News

ក្លិបហង្សក្រហម Liverpool បានទទួលសមាជិកថ្មី២រូបជាផ្លូវការហើយ គឺ Iago Aspas និង Luis Alberto។ ដូច Sabay ធ្លាប់បានផ្សាយកន្លងមកហើយថា កីឡាករទាំងពីររូបនេះ បានមកដល់ក្លិបនេះតាំងពីសប្ដាហ៍មុនមកម្ល៉េះ ប៉ុន្តែមិនទាន់បញ្ចប់ការផ្ទេរជាផ្លូវការប៉ុណ្ណោះ។

Iago Aspas បានផ្ទេរពី Celta Vigo ក្នុងតម្លៃ៧លានផោន ដោយចុះកិច្ចសន្យារយៈពេលវែង ខណៈ Alberto បានចុះកិច្ចសន្យារយៈពេល៤ឆ្នាំ ក្នុងតម្លៃខ្លួន ៦,៨លានផោន។

Luis Alberto កាន់អាវថ្មីរបស់ខ្លួន

Aspas ពេលលេងនៅ Celta Vigo

ខ្សែប្រយុទ្ធសញ្ជាតិអេស្ប៉ាញ Aspas បានស៊ុតបញ្ចូលទី១២គ្រាប់ក្នុងការបង្ហាញខ្លួន៣៥ប្រកួតឲ្យ Celta Vigo ក្នុងរដូវកាលកន្លងទៅ។ កីឡាករវ័យ២៥ឆ្នាំ ធ្លាប់ត្រូវបានអ្នកចាត់ការហង្សក្រហម Brenden Rodgers ចាប់អារម្មណ៍តាំងពីលោកនៅដឹកនាំ Swansea មកម្ល៉េះ។

ចំណែក Alberto ដែលមានសញ្ជាតិអេស្ប៉ាញដែរនោះ គឺជាកីឡាករដែលត្រូវបានក្លិប Barcelona B ខ្ចីជើងពី Sevilla កាលពីរដូវកាលមុន ដោយបង្ហាញខ្លួន៣៨ប្រកួត និងស៊ុតបញ្ចូលទី១១គ្រាប់។ ជុំវិញការទទួលបានសមាជិកថ្មីវ័យត្រឹម២០ឆ្នាំនេះ លោក Rodgers បាននិយាយឲ្យដឹងថា៖ “យើងគ្រប់គ្នានៅក្នុងក្លិប សប្បាយចិត្តដែល Luis បានសម្រេចចិត្តចូល Liverpool។ ខ្ញុំកំពុងទន្ទឹងរង់ចាំធ្វើការជាមួយគាត់ ដើម្បីអភិវឌ្ឍសមត្ថភាពរបស់គាត់ ហើយគាត់បានចូលក្នុងចំណោមកីឡាករក្មេងៗរបស់ក្លិបយើង”។

កីឡាករសញ្ជាតិអេស្ប៉ាញទាំងពីរនេះ គឺជាសមាជិកទី២ និងទី៣ នៅ Anfield ក្រោយពី Liverpool ចុះកុងត្រាជាមួយខ្សែការពារក្លិបមេឃខៀវ Manchester City, Kolo Toure នាពេលកន្លងមក។ ក្លិបនេះក៏ត្រៀមទទួលបានអ្នកចាំទី Simon Mignolet របស់ក្រុមឆ្មាខ្មៅ Sunderland ជាផ្លូវការផងដែរ៕

ប្រភពៈ sabay

ក្រុងកម្ពុជា	កោះសន្តិភាព
ដើមអម្ពិល	CEN
កម្ពុជាថ្មី	នគរវត្ត
រស្មីកម្ពុជា	ភ្នំពេញ ដេលី
កម្ពុជាថ្ងៃនេះ	វត្តភ្នំ
ann	វិរជនខ្មែរ
វិទ្យាសាស្ត្រខ្មែរ	ខ្មែរស្ថាបនា
ដំណឹងយប់មិញ	ភ្នំពេញប៉ុស្តិ៍
Everyday	ថ្មីៗ
បាយ័ន	Seat TV
CNC	ទទក
My TV	ហង្សមាស
វាយោ	ខេមរភា សា
វិទ្យអាស៊ីសេរី	VOA News
សំបុកឃ្មុំ	វិទ្យុអូស្ត្រាលី
ABC Nonstop	វិទ្យុ FM102
VOD News	ព្រៃនគរ
៥០០០ឆ្នាំ	Yellow Pages
មនសិការខ្មែរ	ព័ត៌មានសេរី
សម្លេងម.ឆ្នោត	ចលនាអំណាចព.
មាតុភូមិ

Khmer24	Go-Emarket
Khmer Lists	Phsa Online
BamBoow	I Know
Khmer68	Khmer168
Sabaylokda	Ecam.Mkt
7Makara	Orkun2u
Psa Smart	Bong Thom
កៅឆាយ	Cam. Job
Khmer Kalip	AsiaJobs77
CamboFree	CamHR
Koprey	HR Cambodia
DomreyMarket	Kh.Best Buy
ARE Cambodia	Khmer71
Think Property	CRA
Khmer360	Gladmarket
Kh,Marketing

Khmerload	LookingToday
CAMNEWS	Kalib Stare
Popzone	Sabay News
ដំណឹង	Khmer-Note
ខេមបូឌាផេក	Cam111
Khmerherald	AngkorOne
News Today	AngkorThom.
KhmerMagazines	ទស្សនាវដ្តីខ្មែរ
KhmerStarWorld	Khpop
Khmer79

Pages

Recent Post

Khmer News Websites

Business&Find Job WebSites

Entertainment WebSites

About Me

Followers

Blog Archive

Featured Posts

Anachak Angkor

Bayon Temple

Apasara Angkor

Farm of Khmer

Provinces of Cambodia

View of Sun Set in Cambodia

Security Gaurd of Anachak Angkor

និស្សិតខ្មែរសិក្សានៅអាមេរិក ប្រាប់ពីល្បិចសុំអាហារូបករណ៍បរទេស

សមត្ថភាព និងការជឿជាក់លើខ្លួនឯងនាំឲ្យខ្ញុំជាប់អាហារូបករណ៍សិក្សានៅជប៉ុន

មុនបានអាហារូបករណ៍បរទេសខ្ញុំធ្លាប់ជាសិស្សគេចសាលា និងញៀនបាល់

តិកនិករៀនត្រៀមមុនថ្ងៃប្រឡងដែលត្រូវយល់ដឹង

ការស្លៀកពាក់៥យ៉ាងដែលត្រូវជៀសវាងក្នុងរដូវភ្លៀង

កូរ៉េខាងត្បូងតែងតាំងគ្រូបង្វឹកថ្មីត្រៀម World Cup ឆ្នាំក្រោយ

Aspas និង Alberto ចូល Liverpool ជាផ្លូវការ

Blogroll

Text File

Labels

Coolbthemes.com

Contatc