ក្លិបឈ្នះពានរង្វាន់បីកាលពីរដូវកាលមុន Bayern Munich បានបង្ហាញមុខគ្រូបង្វឹកថ្មី Pep Guardiolaជាផ្លូវការជា កាលពីថ្ងៃចន្ទម្សិលមិញនេះ។
អតីតគ្រូបង្វឹកក្លិបអ្នកមានបុណ្យ Barcelona បាននិយាយក្នុងឱកាសសន្និសីទកាសែតលើកដំបូងនេះថា លោកបានត្រៀមរួចរាល់ហើយក្នុងការទទួលយកសម្ពាធក្នុងក្លិបដែលទើបនឹងទទួលជោគជ័យដ៏សម្បើម។ កាលពីរដូវកាលមុន ក្រោមការដឹកនាំរបស់លោក Jupp Heynckes ក្លិបយក្សរបស់អាល្លឺម៉ង់មួយនេះ បានឈ្នះពានលីកក្នុងស្រុក ពាន Cup និងពានទ្វីបអឺរ៉ុប UEFA Champions League ដែលទាំងនេះហើយជាសម្ពាធសម្រាប់គ្រូបង្វឹកថ្មីក្នុងការធ្វើយ៉ាងណាដើរតាមជោគជ័យនេះ។
ពាក់អាវធំពណ៌ប្រផេះ ជាមួយក្រវាត់កពណ៌ក្រហមក្រម៉ៅ អ្នកចាត់ការសញ្ជាតិអេស្ប៉ាញ បាននិយាយជាភាសាអាល្លឺម៉ង់ក្នុងន័យជាខេមរភាសាថា៖ “ខ្ញុំត្រូវទទួលយកនូវការប្រៀបធៀប។ ខ្ញុំស្ថិតនៅក្រោមសម្ពាធ ប៉ុន្តែខ្ញុំដឹងច្បាស់ពីរឿងនេះ ហើយខ្ញុំបានទទួលយកការប្រជែងថ្មីនេះ ដោយគ្មានការភ័យខ្លាចនោះទេ”។
Guardiola បានដឹកនាំក្លិប Barcelona ឲ្យឈ្នះពានរង្វាន់ដល់ទៅ១៤ ក្នុងរយៈពេលត្រឹមតែ៤ឆ្នាំប៉ុណ្ណោះ។ ក្រោយចាកចេញពីក្លិបជើងឯកអេស្ប៉ាញនេះ គ្រូបង្វឹកវ័យ៤២ឆ្នាំ បានចំណាយពេលសម្រាកវិស្សមកាលជាមួយគ្រួសារនៅទីក្រុងញូវយ៉ក រហូតចុះហត្ថលេខានៅ Bayern Munich កាលពីខែមករាកន្លងទៅ។ លោកនឹងដឹកនាំក្លិបដ៏ជោគជ័យរបស់អាល្លឺម៉ង់មួយនេះទៅបោះជំរំហ្វឹកហាត់នៅអ៊ីតាលីដើមខែក្រោយ ដោយត្រូវប្រកួតមិត្តភាពកំដៅសាច់ដុំជាមួយក្រុមមួយចំនួននៅអ៊ីតាលី មុនប៉ះគូប្រជែង Borussia Dortmund ក្នុងពាន Telekom Cup៕
Source : sabay