ការស្លាប់របស់នារីបម្រើលើយន្តហោះជនជាតិចិនវ័យ ២៣ឆ្នាំ ឈ្មោះ Ma Ailun ថ្មីៗនេះ បានបង្កឲ្យមានការជជែកវែកញែកមិនត្រឹមតែប្រទេសចិនខ្លួនឯងប៉ុណ្ណោះទេ ប៉ុន្តែទូទាំងពិភពលោកទាំងមូល។ ចម្ងល់ដែលគ្រប់គ្នាមន្ទិលខ្លាំងនោះគឺថា តើការបញ្ចូលថ្មនៅពេលនិយាយពិតជាអាចឲ្យឆក់មនុស្សស្លាប់មែនឬទេ?
បញ្ហានេះត្រូវបានអ្នកជំនាញជាច្រើនលើកឡើងថា ឱកាសដែលនាំឲ្យឆក់មនុស្សដល់ស្លាប់នោះគឺ មានតិចតួចបំផុត។ សម្រាប់ការសាកថ្មដោយប្រើប្រាស់ USB គឺមានថាមពលប្រហែល ៥ វ៉ុល ប៉ុណ្ណោះដែលនេះមិនគ្រប់គ្រាន់ធ្វើឲ្យមនុស្សម្នាក់គ្រោះថ្នាក់ឡើយ។
“យើងឃើញមានករណីឆក់ដែលពាក់ព័ន្ធនឹងការប្រើប្រាស់ទូរសព្ទតិចតួចបំផុត”។ នេះជាការគូសបញ្ជាក់របស់លោក Scott Wolfson ប្រធានផ្នែកទំនាក់ទំនងនៃគណៈកម្មការសុវត្ថិភាពអ្នកប្រើប្រាស់ផលិតផលអាមេរិក។ លោកបន្ថែមថា បញ្ហាគ្រោះថ្នាក់ដែលលោកធ្លាប់ជួបភាគច្រើនគឺ ករណីក្ដៅខ្លាំង ហុយផ្សែង និងឆេះជាដើម”។
អ្នកជំនាញបញ្ជាក់ថា គ្រោះថ្នាក់អាចមានការប្រឈមខ្លាំងនៅពេលអ្នកប្រើប្រាស់ឆ្នាំងសាកដែលគ្មានគុណភាព ឬមិនត្រូវគ្នានឹងប្រភេទទូរសព្ទ។ ឆ្នាំងសាកទូរសព្ទមួយចំនួនមិនមានទ្រនាប់កម្ដៅ ដែលងាយប្រឈមនឹងបញ្ហាឡើងកម្ដៅខ្លាំង ឆេះ ឬឆក់ជាដើម។ ក្នុងអត្ថបទដែលចុះផ្សាយថ្មីមួយបានសរសេរថា សមាគមអ្នកប្រើប្រាស់របស់ចិនបានព្រមានថា ទីផ្សាររបស់ចិនកំពុងជោរជន់ទៅដោយឆ្នាំងសាកក្លែងក្លាយដែលអាចធ្វើឲ្យទូរសព្ទអ្នកទៅជា “គ្រាប់បែក” បាន។
អ្នកជំនាញខាងលើបានណែនាំថា បើឆ្នាំងសាករបស់អ្នកខូច អ្នកប្រើប្រាស់គួរទៅរកទិញផលិតផលដើមពីក្រុមហ៊ុនដែលផលិតផលិតផលនោះជាជាងទៅរកឆ្នាំងសាកតម្លៃថោកដែលគ្មានគុណភាព។ ចំណុចដែលគួរជៀសវាងមួយទៀតគឺ ការលើកយកទូរសព្ទមកនិយាយនៅពេលកំពុងសាក ខណៈដៃរបស់អ្នកមានសំណើម ដែលអាចប្រឈមនឹងការឆក់បាន។ លោក Scott ក៏បានព្រមានពីការ ទុកទូរសព្ទនៅកន្លែងហប់ជិតឈឹងពិសេសនៅពេលអាកាសធាតុកំពុងកើនកម្ដៅដូចបច្ចុប្បន្ន។
តាមការធ្វើកោសល្យវិច័យរបស់ប៉ូលិសបង្ហាញថា កញ្ញា Ma Ailun ពិតជាត្រូវឆក់ស្លាប់មែន ប៉ុន្តែមិនបានបញ្ជាក់ឲ្យលម្អិតបន្ថែមទៀតឡើយ។ ចំណុចដ៏គួរឲ្យសង្ស័យមួយទៀតនោះគឺថា តើឆ្នាំងសាកដែលនាងប្រើប្រាស់នោះជាឆ្នាំងសាកប្រភេទណា?
បងស្រីរបស់ជនរងគ្រោះបានរៀបរាប់ថា ប្អូនស្រីរបស់ខ្លួនទិញទូរសព្ទ iPhone 5 នោះពីហាង Apple ស្របច្បាប់ និងប្រើប្រាស់ឆ្នាំងសាក Original នៅពេលឆក់ស្លាប់ ខណៈពេលនោះនាងចេញពីបន្ទប់ទឹកមកទទួលទូរសព្ទ។ អីចឹងតើមូលហេតុដែលនាំឲ្យ MA ឆក់ស្លាប់អាចបណ្ដាលមកពីនាងនិយាយពេលដៃមានសំណើម ប្រើប្រាស់ឆ្នាំងសាកគ្មានគុណភាព ឬមកពីបញ្ហាណាមួយផ្សេងទៀត?
Source : sabay news