ការបើកបរពេលមានភ្លៀងធ្លាក់ មិនថាធ្វើដំណើរក្នុងក្រុង ឬដំណើរផ្លូវឆ្ងាយឡើយ អ្នកបើកបរភាគច្រើនប្រឈមនឹងបញ្ហាសុវត្ថិភាពតាមដងផ្លូវកាន់តែខ្ពស់តែម្ដង។ ភ្លៀងមានឥទ្ធិពលលើដងផ្លូវក្រាលដោយកៅស៊ូ ឬដីក្រហម, យានយន្ត និងលទ្ធភាពមើលផ្លូវបើកបររបស់អ្នក។
អាស្រ័យហេតុនេះ Sabay សូមបង្ហាញពីវិធីសាស្ត្រខ្លះៗសម្រាប់ការបើកបរប្រកបដោយសុវត្ថិភាពពេលមេឃភ្លៀង ឬក្នុងរដូវភ្លៀង។
ជំហានដំបូងគេបង្អស់មុនពេលបើកបរ អ្នកគប្បីត្រួតពិនិត្យយានយន្តរបស់អ្នកជាប្រចាំ ដូចជា ប្រព័ន្ធភ្លើង ប្រព័ន្ធហ្វ្រាំង ហ្គែរ ចង្កូត សម្បកកង់ជាដើម។ ខាងក្រោមនេះ ជាចំណុចដែលគួរធ្វើ និងមិនគួរធ្វើពេលបើកបរយានយន្ត៖
១. គួរ៖
បន្ថយល្បឿន៖ ពេលមេឃភ្លៀង ឬក្រោយភ្លៀង ផ្លូវនឹងសើមមានទឹកច្រើន ជាហេតុធ្វើឲ្យយានយន្តរបស់អ្នករអិល។ ចៀសវាងគ្រោះថ្នាក់កើតមានជាយថាហេតុ អ្នកគួរបន្ថយល្បឿនមកកម្រិតល្មមគួរសម។
រក្សាគម្លាតរថយន្ត៖ ព្យាយាមរក្សាគម្លាតចម្ងាយរវាងយានយន្តរបស់អ្នក និងយានយន្តនៅខាងមុខ ឲ្យឆ្ងាយជាងកម្រិតធម្មតាគ្មានមេឃភ្លៀង ដោយហេតុថា បើអ្នកជាន់ហ្វ្រាំងឈប់ ឬប្រថុចញ៉ុច យានយន្តអ្នកនឹងមិនរអិលជ្រុលទៅបុកគូថយានយន្តខាងមុខឡើយ។
បើកភ្លើង៖ អ្នកត្រូវបើកភ្លើងយានយន្តពេលធ្វើដំណើរមានភ្លៀងធ្លាក់ ឬមេឃងងឹត ដើម្បីបញ្ចៀសគ្រោះថ្នាក់បុកគ្នាដោយមើលមិនឃើញ។
បើកបរក្នុងជួរ៖ ត្រូវបើកបរក្នុងជួររថយន្តដែលនៅខាងមុខអ្នក ដើម្បីបញ្ចៀសគ្រោះថ្នាក់ ព្រោះថាបើអ្នកចង់លឿន ហើយបើកបរខុសជួរ អាចនឹងមានបញ្ហាមើលផ្លូវមិនឃើញពេលមេឃភ្លៀង និងបុកយានយន្តបញ្ច្រាសទិសគ្នា។ ម្យ៉ាងទៀត អ្នកអាចសម្គាល់មើលផ្លូវយ៉ាងស្រួល ដោយភ្លើងហ្វ្រាំងរបស់យានយន្តខាងមុខអ្នក។
២. មិនគួរ
ជាន់ហ្វ្រាំងគំហុកពេក៖ ចៀសវាងជាន់ ឬចាប់ហ្វ្រាំងយ៉ាងគំហុកប្រថុចញ៉ុចភ្លាមៗពេលបើកបរមេឃកំពុងភ្លៀង ឬលើដងផ្លូវសើមជោគជាំំដោយទឹក ព្រោះអាចរអិលជ្រុលទៅបុកអ្វីៗនៅតាមដងផ្លូវ។ បើបើកបរលឿន ស្រួលមិនស្រួលអាចនឹងក្រឡាប់ ឬរអិលដួលទៀតក៏ថាបាន។ អ្នកត្រូវជាន់ហ្វ្រាំងពីចម្ងាយជាការប្រសើរ។
បើកបរពេលមេឃភ្លៀងខ្លាំង៖ ភ្លៀងខ្លាំង គឺពោរពេញដោយគ្រាប់ភ្លៀងធំៗគួបផ្សំនឹងខ្យល់ខ្លាំង ជាហេតុធ្វើឲ្យអ្នកពិបាកមើលផ្លូវ។ បើទោះអ្នកបើកភ្លើងយានយន្តក៏ដោយ ក៏អ្នកពិបាកនឹងមើលថាតើមានអ្វីនៅខាងមុខដែរ។ ដូច្នេះ បើភ្លៀងខ្លាំងងងឹត សូមជ្រកភ្លៀង ឬរង់ចាំភ្លៀងអន់បន្តិច សឹមធ្វើដំណើរបន្ត។
បើកបរមានផ្គររន្ទះ៖ ភ្លៀងដើមឆ្នាំ ឬដើមរដូវ តែងតែកាច ដោយនាំមកនូវទឹកភ្លៀងគ្រាប់ធំៗលាយឡំនឹងសំឡេងផ្គររន្ទះគំរាមកំហែងដល់អ្នកបើកបរទាំងឡាយ។ ដើម្បីចៀសវាងគ្រោះថ្នាក់ជាយថាហេតុណាមួយដោយរន្ទះ ជាពិសេសដំណើរផ្លូវឆ្ងាយ អ្នកគប្បីជ្រកភ្លៀងសិន រួចសឹមបន្តដំណើរ។ អូ! កុំភ្លេចបិទទូរសព្ទ ឬ tablet ផងណា៎!។
Source : Sabay
0 comments:
Post a Comment