ក្រុមម្ចាស់ផ្ទះប្រេស៊ីលបានកក់កៅអីនៅវគ្គផ្ដាច់ព្រ័ត្រនៃពានរង្វាន់ Confederations Cup ហើយ ក្រោយឈ្នះអ៊ុយរុយហ្គាយ ២-១ នៅវគ្គពាក់កណ្ដាលផ្ដាច់ព្រ័ត្រយប់មិញនេះ។
នេះជាការបន្តកំណត់ត្រា១០០% (មិនចាញ់ មិនស្មើ) សម្រាប់ប្រេស៊ីលក្នុងបួនប្រកួត ចាប់តាំងពីថ្ងៃបើកឆាកមក។ ការតែតមួយគ្រាប់នៅចុងម៉ោងរបស់ Paulinho គឺគ្រប់គ្រាន់ឲ្យក្រុមសាំបាឡើងទៅចាំមុននៅវគ្គផ្ដាច់ព្រ័ត្រនៅថ្ងៃអាទិត្យខាងមុខនេះ ដោយរង់ចាំជួបអេស្ប៉ាញ ឬអ៊ីតាលី។
Paulinho លោតតែតគ្រាប់ជ័យជម្នះឲ្យប្រេស៊ីល
Fred បានជួយឲ្យប្រេស៊ីលនាំមុខមុននៅ៣នាទីមុនចប់តង់ទី១ ក្រោយទទួលបាល់ពី Neymar។ ប៉ុន្តែអ៊ុយរុយហ្គាយបានតាមស្មើវិញនៅដើមតង់ទី២ ដោយការស៊ុតរបស់ Edinson Cavani បន្ទាប់ពីខ្សែការពារប្រធានក្រុមប្រេស៊ីល Thiago Silva ភ្លាត់ស្នៀតនៅមុខទីខ្លួនឯង។
អ៊ុយរុយហ្គាយមានឱកាសបានបាល់ពិន័យ១១ម៉ែត្រតាំងពីនាទី១៤ ប៉ុន្តែមិនអាចនាំមុខម្ចាស់ផ្ទះបាន បន្ទាប់ពីអ្នកចាំទី Julio Cesar អាចជួយសង្រ្គោះការស៊ុតរបស់ Diego Forlan បាន។ បាល់ពិន័យ១១មែត្រនេះ កើតឡើងក្រោយពី David Luiz បានបង្កកំហុសលើប្រធានក្រុមអ៊ុយរុយហ្គាយ Diego Lugano ក្នុងតំបន់គ្រោះថ្នាក់។
Cavani ស៊ុតបញ្ចូលទីតាមស្មើឲ្យអ៊ុយរុយហ្គាយ
Fred ស៊ុតគ្រាប់ទី១ឲ្យប្រេស៊ីល
គ្រាប់បាល់ជ័យជម្នះដែលធ្វើឲ្យកីឡដ្ឋាន Estadio Mineirao ទាំងមូលកក្រើកឡើងនោះ គឺកើតឡើងនៅ៤នាទីមុនចប់ការប្រកួត ពោលគឺពេលដែលបាល់ដែលទាត់ចេញពីជ្រុងដោយ Neymar ទៅចំក្បាល Paulinho ដែលលោតសំកាំងខ្លួនតែតបំប៉ោងសំណាញ់ទីយ៉ាងល្អ៕
Source : sabay