រាជរដ្ឋាភិបាលកម្ពុជា បានចាប់ដៃគ្នាជាមួយរដ្ឋាភិបាលអូស្ត្រាលីក្នុងកិច្ចខិតខំប្រឹងប្រែងប្រើប្រាស់ប្រព័ន្ធអ៊ីនធឺណិតអភិរក្សតំបន់អង្គរដែលជាសម្បត្តិបេតិកភណ្ឌពិភពលោកដែលមិនអាចកាត់ថ្លៃបាន។ នេះបើយោងតាមការចុះផ្សាយរបស់ស្ថានទូតអូស្ត្រាលីកាលពីថ្ងៃព្រហស្បតិ៍។
ជាផ្នែកមួយនៃគម្រោងមេដើម្បីទប់ស្កាត់ការបំផ្លិចបំផ្លាញប្រាសាទ គេហទំព័រដែលទើបបើកដំណើរការថ្មីៗឈ្មោះAngkor Sunset Finder នឹងជួយណែនាំព័ត៌មានដល់ភ្ញៀវទេសចរថា កន្លែងណាមួយនៃតំបន់អង្គរដែលមានទំហំ ៤០០គីឡូម៉ែត្រការ៉េ អាចទស្សនាថ្ងៃលិចស្អាតបំផុត។
គេហទំព័រថ្មីអនុញ្ញាតឲ្យអ្នកចូលមើលជ្រើសរើសលក្ខខណ្ឌដែលខ្លួនចូលចិត្តដូចជា បរិយាកាស ចម្ងាយពីខ្លោងទ្វា ចំនួនមនុស្សជាដើម ក្រោយមកចុចពាក្យ Search គេហទំព័រនឹងណែនាំកន្លែងដ៏សក្ដិសមបំផុតដែលជាជម្រើសថតរូបថ្ងៃអស្តង្គតស្អាតបំផុតចំនួន ៣៤ ជុំវិញតំបន់អង្គរ។
គេហទំព័រ Angkor Sunset Finder ជាផ្នែកមួយក្របខណ្ឌគម្រោងគ្រប់គ្រងបេតិកភណ្ឌដែលផ្ដល់ជំនួយដោយអូស្ត្រាលី “ដើម្បីឆ្លើយតបទៅនឹងការកើនឡើងនៃទេសចរ ការប្រឈមថ្មីនៃបរិស្ថាន និងការអភិវឌ្ឍយ៉ាងឆាប់រហ័សនៃសហគមន៍ជិតតំបន់អង្គរ”។ នេះជាការលើកឡើងក្នុងសេចក្ដីថ្លែងការណ៍របស់ស្ថានទូតអូស្ត្រាលីប្រចាំកម្ពុជា។
កសាងចន្លោះពីសតវត្សទី ៩ ដល់ទី ១៤ ប្រាសាទអង្គរត្រូវបានប្រជាជនកម្ពុជាចាត់ទុកជានិមិត្តរូបនៃមោទនភាពជាតិ និងជាតំបន់ទេសចរណ៍ដ៏សំខាន់របស់ប្រទេសដែលទាក់ទាញអ្នកទេសចរប្រហែល ២ លាននាក់ក្នុងមួយឆ្នាំៗ។ អង្គរវត្តជាបេតិកភណ្ឌពិភពលោកដ៏អស្ចារ្យបំផុតមួយក្នុងចំណោមបេតិកភណ្ឌល្បីៗជុំវិញពិភពលោកដែលចុះបញ្ជីដោយអង្គការបេតិកភណ្ឌពិភពលោក UNESCO៕
source : sabay