ខែនេះកាលពីឆ្នាំទៅ និស្សិតសាកលវិទ្យាល័យភូមិន្ទភ្នំពេញ ឡាំង មេសា កំពុងតែសិក្សាបន្ថែមពីប្រពៃណីវប្បធម៌អាស៊ី រាប់ទាំងវប្បធម៌ខ្លួនឯងផង ដើម្បីត្រៀមទៅបង្ហាញ យុវជន អាស៊ានផ្សេងទៀតបានស្គាល់។ ប្រហែលជាបីខែក្រោយមក មេសា និងយុវជនខ្មែរផ្សេងទៀតជិត៣០នាក់បានធ្វើដំណើរទៅកាន់ប្រទេសជប៉ុន ដើម្បីចូលរួមក្នុងកម្មវិធី “នាវាយុវជនអាស៊ីអាគ្មេយ៍”។
វាជាកម្មវិធីដែល យុវជនក្នុងប្រទេស ជាសមាជិកអាស៊ានប្រាថ្នាចង់ទៅចូលរួមបំផុត ពីព្រោះគេមិនត្រឹមតែអាចទៅលេងនៅប្រទេសជប៉ុន និងប្រទេសជាសមាជិកអាស៊ានមួយចំនួនប៉ុណ្ណោះទេ ប៉ុន្តែថែមទាំងអាចចូលរួមក្នុងកម្មវិធីសប្បាយៗជាច្រើនទៀត។
យុវជន ឡាំង មេសា
មេសា បានទៅជួបយុវជនជប៉ុន និងយុវជនមកពីប្រទេសជាសមាជិកអាស៊ាន៩ផ្សេងទៀត ដើម្បីឡើងកប៉ាល់ដ៏ធំមួយ ធ្វើដំណើរមកកាន់បណ្តាប្រទេសជាសមាជិកអាស៊ាន ដែលមានរយៈពេលជិតពីរខែឯណោះ។ យុវជនខ្មែររូបនេះបានធ្វើដំណើរទៅ៦ប្រទេស គឺមានជប៉ុន វៀតណាម ថៃ ឥណ្តូណេស៊ី ស៊ីងហ្គាពួ និងព្រុយណេ។
តែមុននឹងចាកចេញទៅចូលរួមក្នុងកម្មវិធីនេះ មេសា បានហ្វឹកហាត់ត្រៀមរយៈពេលបីខែ ដោយរៀនអំពីភាពជាអ្នកដឹកនាំ ការធ្វើការងារជាក្រុម ពិភាក្សាលើបញ្ហាអន្តរជាតិ សិក្សាពីវប្បធម៌អាស៊ាន ជប៉ុន ជាពិសេសរបាំ និងចម្លាក់បុរាណរបស់ខ្មែរ។
មេសា លើកឡើងថា៖ “មុននឹងទៅចូលរួម ខ្ញុំបានសិក្សាអំពីរបាំ និងវប្បធម៌ខ្មែរ ពីព្រោះយើងត្រូវធ្វើបទបង្ហាញវប្បធម៌របស់យើងទៅកាន់ពិភពលោកខាងក្រៅ។ ខ្ញុំមិនដែលស្រមៃថា ខ្ញុំនឹងរៀនរាំរបាំប្រពៃណី និងរបាំបុរាណទៅសម្ដែងលើឆាកអន្តរជាតិបែបហ្នឹងទេ តែអរគុណដែរ ដែលកម្មវិធីនេះបានធ្វើឲ្យខ្ញុំក្លាហាន និងទុកចិត្តខ្លួនឯង”។
យុវជនរូបនេះបញ្ជាក់បន្ថែមថា៖ “កូនខ្មែរមានការអៀនខ្មាស់ និងមិនហ៊ានបញ្ចេញមិតជាសាធារណៈទេ។ បើបានចូលរួមក្នុងកម្មវិធីនេះ ពួកគេនឹងមានការលើកទិកចិត្ត ពីយុវជនដទៃទៀតឲ្យមានភាពក្លាហាន”។
លើសពីការរំពឹងទុក មេសា មិនត្រឹមតែទទួលបានចំណេះដឹងច្រើនទាក់ទងនឹងប្រទេសជប៉ុន និងបណ្តាប្រទេសជាសមាជិកអាស៊ានប៉ុណ្ណោះទេ ប៉ុន្តែយុវជនរូបនេះបានទាំងបង្កើតទំនាក់ទំនង និងបណ្តាញជាមួយយុវជនក្នុងតំបន់អាស៊ីផងដែរ។
កម្មវិធី “នាវាយុវជនអាស៊ីអាគ្នេយ៍”នេះបានបង្កើតឡើងតាំងពីឆ្នាំ១៩៧៤ ក្រោមការសហការណ៍គ្នារវាងប្រទេសជប៉ុន និងប្រទេសឥណ្តូណេស៊ី ម៉ាឡេស៊ី ហ្វីលីពីន ស៊ីងហ្គាពួ និងប្រទេសថៃ។ ក្រោយមក ប្រទេសដែលចូលជាសមាជិកអាស៊ានផ្សេងទៀត បានចូលរួមក្នុងកម្មវិធីនេះជាបន្តបន្ទាប់។
ចំណែកកម្ពុជាបានបញ្ជូនយុវជនខ្លួនទៅចូលរួមក្នុងកម្មវិធីនេះនៅឆ្នាំ២០០០។ នេះបើយោងតាមសេចក្តីប្រកាសជ្រើសរើសបេក្ខជនឲ្យទៅចូលរួមក្នុងកម្មវិធីនេះសម្រាប់ឆ្នាំ២០១៣ កាលពីខែមេសាកន្លងទៅ ចេញដោយឯកឧត្តម ជ័យ ចាប រដ្ឋលេខាធិការក្រសួងអប់រំយុវជន និងកីឡា។
កញ្ញា លី សិរីរតន៍ អ្នកដែលគ្រោងដឹកនាំយុវជនកម្ពុជាទៅចូលរួមក្នុងកម្មវិធី “នាវាយុវជនអាស៊ីអាគ្នេយ៍” ឆ្នាំ២០១៣នេះ បានឲ្យដឹងថា កម្ពុជាជ្រើសបានយុវជន១៤នាក់ និងយុវនារី១៤នាក់ហើយ។
នៅចុងខែតុលា ឬដើមខែវិច្ឆិកា កញ្ញានឹងដឹកនាំយុវជនតំណាងប្រទេសកម្ពុជាជិះយន្តហោះទៅកាន់ប្រទេសជប៉ុន។ ពួកគេនឹងជួបជុំយុវជនជប៉ុន និងយុវជនមកពីបណ្តាប្រទេសជាសមាជិកអាស៊ានផ្សេងទៀតនៅទីនោះ ហើយប្រារព្ធកម្មវិធីផ្សេងៗរួមគ្នា មុននឹងឡើងកប៉ាលដ៏ធំមួយ ធ្វើដំណើរទៅទស្សនកិច្ចនៅប្រទេសជាសមាជិកអាស៊ានចំនួន៥។
កញ្ញាឲ្យដឹងថា យុវជនទាំង២៨នាក់ដែលបានជាប់ គឺត្រូវបានកំណត់ក្នុងលក្ខខណ្ឌ គឺមានអាយុចន្លោះពី១៨ ដល់៣០ឆ្នាំ មានចំណេះដឹងផ្នែកភាសាអង់គ្លេសគ្រាន់បើ និងមានចំណេះដឹងផ្នែកវប្បធម៌ទូទៅគ្រាន់បើ ដូច្នេះយុវជនដែលចង់ទៅចូលរួមក្នុងកម្មវិធី “នាវាយុវជនអាស៊ីអាគ្នេយ៍” នេះនៅឆ្នាំក្រោយ គឺត្រូវស្របតាមលក្ខខណ្ឌខាងលើ៕
source : sabay