ប្រភពពីសារព័ត៌មាន Channelnewsasia បានរាយការណ៍មកថា មានអ្នកទោសឥណ្ឌូណេស៊ីចំនួន ២០០នាក់ បានរត់គេចខ្លួនបន្ទាប់ពីមានអំពើហិង្សាដុតកម្ទេចពន្ធនាគារមួយកន្លែងនៅក្រុង Medan កោះសូម៉ាត្រា កាលពីម្សិលមិញ។
ប្រភពពីមន្ត្រីពន្ធនាគារខាងលើ បានឲ្យដឹងថា ការរត់គេចខ្លួនរបស់អ្នកទោសទាំងនេះធ្វើឡើងបន្ទាប់ពីមានអ្នកទោសភេរវកម្មចំនួន ១៣ រួមទាំងអ្នកទោសជាច្រើនរយនាក់ផ្សេងទៀត ដែលស្ថិតនៅក្នុងពន្ធនាគារនេះ បានបះបោរ វាយកម្ទេចជញ្ជាំងគុក និងដុតបំផ្លាញអគារពន្ធនាគារចោល ដើម្បីបង្កើតភាពចលាចលដែលអាចធ្វើឲ្យអ្នកទោសរត់គេចចេញពីពន្ធនាគារខាងលើបាន។
អ្នកនាំពាក្យប៉ូលិសក្រុងខាងលើ បានបញ្ជាក់ផងដែរ អណ្ដាតភ្លើងនៅតែបន្តឆេះរហូតដល់ម៉ោង ១០:០០យប់មិញ បន្ទាប់ពីអ្នកទោសបានដុតបំផ្លាញតាំងពីរសៀលថ្ងៃដដែលនេះ។ លោកបានបន្តថា ប៉ូលិសចំនួន ៧០០នាក់ត្រូវបានបញ្ជូនទៅទីនោះភ្លាមៗផងដែរ ដើម្បីធ្វើអន្តរាគមន៍រក្សាសណ្ដាប់ធ្នាប់ឡើងវិញ និងធ្វើការពារអ្នកទោសជាង ២.៦០០នាក់ផ្សេងទៀតដែលកំពុងស្ថិតនៅទីនោះ៕
source : sabay news